-ТЭД С.БАЯРААС ТАВАН ТОЛГОЙ, АСГАТЫН ОРДУУДЫГ “ШАНАЛГАХ” БОЛОЛТОЙ
-Энэ сарын долоон буюу маргааш “Монгол Оросын бизнес форум” Улаанбаатар хотод нээлтээ хийнэ. ОХУ-ын “Газпромбанк”-ны ивээл дор явагдах энэ чуулга уулзалтад хоёр орны төлөөлөл уул уурхай, төмөр зам, худалдаа эдийн засгийн чиглэлээр ярилцах юм. ОХУ-ын төлөөлөгчдийг тус улсын ерөнхийлөгч В.Путины хүн гэгддэг Хөдөө аж ахуйн сайд А.В.Гордеев ахлах бөгөөд бүрэлдэхүүнд нь Ерөнхий сайд асан С.В.Кириенко, Москва хотын дарга Ю.М.Лужков, Буриадын ерөнхийлөгч Д.С.Морозов зэрэг төр, засгийн албаны хүмүүсээс гадна таван толгойг сонирхож буй Оросын тэрбумтан Олег Дерпаска, Асгатыг авахаар хөөцөлдөж байгаа “Полиметалл”-ын захирал В.Н.Несис, “Уралмаш”, “Нафта Москва”, “Газпромбанк”-ны захирлууд зэрэг бизнесийн акулууд ирэх юм байна. Тэдний гол зорилго нь Монголын уул уурхайн бодлогыг тандах, болж өгвөл С.Баяраас Таван толгой, Асгатын ордуудыг “шаналгах” бололтой.

“Асгат”-ын хувьд тус ордыг сонирхож ОХУ-ын өндөр албан тушаалтнуудаас эхлээд бизнес эдийн засгийн бүлэглэлүүд удаа манай оронд ирж байсан билээ.

Ноднин зун гэхэд л наадмын үеэр ОХУ-ын ерөнхий сайд ерөнхий сайд М.Фрадковоор ахлуулсан төлөөлөгчид ирж Асгатын мөнгөний ордыг авах тохироо хийгээд буцсан.Түүний үр дүнд ч өнгөрсөн жил манай улсын Ерөнхийлөгчийн ОХУ-д хийсэн айлчлалын үеэр Асгатын мөнгөний ордыг Полиметалл компанид өгөх гэрээ байгуулаад байв. Харин ерөнхий сайд М.Энхболдын засгийн газар уг гэрээг хүлээн зөвшөөрөлгүй цуцлаж байсан билээ. Харин М.Энхболдыг унамагц “Полиметалл” компанийнхан дахин Асгатын мөнгөний ордыг шаналгахаар манай оронд ирж байгаа юм. Баян-Өлгийн аймгийн өндөр уулсын дунд орших тус ордыг ОХУ-ын техник, технологиос өөр зүйл олборлож чадахгүй гэсэн анхааруулгыг манайханд удаа дараа илэрхийлсээр байгаа оросууд энэ удаа А.В.Гордеевийн найрааны ачаар санасандаа хүрч чадна гэж төлөвлөж байгаа бололтой. Харин Тавантолгойн нүүрсний ордыг ОХУ-ын “Северсталь”, “Безовый элемент” зэрэг компани, хөрөнгө оруулагчид сонир­хож байгаагаас “Безовый элемент”-ийн эзэн Оросын тэрбумтан Олег Дерпаска илүүтэй анхаарал тавьж байгаа билээ. Түүний нөлөөгөөр УИХ-ын гишүүд ч хоорондоо “дайтах” болсон мэдээлэл нэг бус удаа гарч байв. Оросуудын хувьд С.Баяр засгийн тэргүүн болсон, Тавантолгойн ордыг төрийн мэдэлдээ авсан зэрэг нь дээрх хоёр ордод эзэмшлээ тогтоох боломжийг нэмэгдүүлсэн гэж эдийн засаг улс төрийн хүрээнийхэн үзэж байна.Мөн С.Баярыг монголчуу­дын эдийн засгийн гол дарамт болсон нефтийн асуудлыг шийдэхийн тулд ОХУ, түүний үндэсний хөрөнгөтнүүдэд Таван толгойгоор найр тавьж болзошгүйг зарим хүмүүс илэрхийлсээр байгаа юм. Энэ ч хардаж болох л нэг хувилбар. Оросын засгийн газрын зүгээс түүнийг ОХУ-д элчин сайдаар ажиллаж байх үед “мөр алгадан” нөхөрлөж явсан хүмүүсийг Монгол руу илгээх нь илүү ач холбогдолтой гэж тус улсын саяханы нэг хэвлэл дээр бичсэн байна. Тэр ч үүднээсээ В.Путин энэ удаа Монголчуудтай хэл амаа сайн ололцдог гэдэг Хөдөө аж ахуйн сайд А.В.Гордеевийг илгээгээд байгаа юм. Маргааш эхлэх “Монгол Оросын бизнес форум”-ын үеэр ОХУ-ын төлөөлөгчид МУ-ын ерөнхийлөгчид бараалхаж, Шинэ ерөнхий сайд С.Баяртай уулзан Таван толгойн нүүрсний орд, Асгатын мөнгөний орд болон худалдаа эдийн засагт хамтран ажиллах талаар ярилцах бололтой. Энэ чуулга уулзалт болон төрийн өндөрлөгүүдтэй уулзах үеэрээ оросууд ямар санал тавихийг харж л байя.